Sälü zäme!
Mir si d'Sandra und Joel, befründeti Singles und mir organisiere e Single-Event für 25-35i 💃🕺
Chum mit, mir göhi Waud und mache es paar Aktivitäte zäme 🌲🌳 Nüt schwirigs oder aasträngends, eifach dass me öppis z'tüe het und sech lockerer cha kenne lehre aus weme eifach zäme am Tisch hockt 😁 Was genau mer mache, wird e Überraschig 😉
Üse Träffpunkt wird guet mitem ÖV erreichbar si i der Region Bärn/ Thun. Mir starte 14:00 und si spetestens 17:00 ume zrügg am Usgangspunkt.
Damit du nachem Event Zit hesch zum der überlege öb und wän du gärn möchtisch widergseh, organisiere mir e Signal- Gruppe, wo du die entsprächendi Person diräkt chasch aaschribe. Mir erkläre de aues vor Ort und du muesch nid dini Nummere usegäh.
Dr definitiv Entscheid öbs stattfingt wird am 10.2.2026 gfällt und denn kommuniziere mer ou dr Träffpunkt. Sötti dr Event nid chönne stattfinge, wärde mer entsprächend e nöje Termin aasetze oder gäbe nech ds Gäud zrügg. Mir bitte hie o um Verständnis, mir kenne nis nid guet mit eventfrog us und lehre aus fliegend 😅
So, was wartisch no? Mir fröje nis uf di! 😋
